2014-08-15 荷官站起來!每週專題
「今天不站出來,他朝再站不出來!」圍賭場,直接了當在公司大門前集會、高歌、喊出員工的呼聲,參加者不再是零零落落的幾十,而是幾百、甚至上千人。從六月初至今,「博彩最前線」發起一波又一波工會行動,率領憤怒的賭場員工直衝金沙、銀娛、澳博的大門,無論是首當其衝的,抑或是隔岸觀火的博企都感受到這股怨氣,悄悄加薪、派股票、發獎金。然而,這場運動社會大多數人只是投以冷冷的目光,在一般民眾眼中,人工已相當優厚的賭場員工怎樣也算不上「弱勢」。在爭取加薪背後,在吶喊的街頭上,一群群滿肚冤屈的賭場前線員工更想說的是:這份工,未做過不知道痛。

博彩職場黑色事件簿

2014-08-15 荷官站起來!每週專題

文:哲廬 / 許諾

時間:2014年08月15日 9:09

B先生 / 監場主任:我諗除咗警察消防員之外,無乜邊份工會做到「爆缸」、日日俾人問候屋企人咁大鑊,出邊啲人坐係冷氣房,又唔使吸二手煙,梗係唔知我哋辛苦成點。有人問我地為咩要嘈?我哋只係為咗爭取應得嘅權益。

何小姐 / 監場主任:啲客成日賭輸錢就賴個荷搞到佢輸,又對住個荷吐痰,將啲籌碼、煙灰盅擲落個荷度,高層又唔理,淨係識叫個荷唔好報警。

陳先生 / 莊荷:啲客一輸錢就當我哋係殺父仇人咁鬧,咩粗口、問候阿爸阿媽都聽慣晒,做呢份工好似無晒尊嚴!

C先生 / 監場主任:試過有一次係貴賓廳,有個客賭輸錢,一枝叉飛埋去個莊荷度,插中佢個臀部,莊荷想報警,但係俾公司撳住話唔好追究,最後個客賠錢了事。

A小姐 / 次級監場主任:試過俾客打,俾客恐嚇,我地唔敢報警,因為驚公司秋後算帳。( 有試過?)有,有次有個伙計比個客打,報咗警,公司之後就要求個伙計去做啲辛苦嘅枱,迫佢走。亦都有荷俾人打完,公司仲要比封警告信佢簽,話佢工作態度唔好。

楊先生 / 監場主任:啲客輸錢發神經已經麻目晒!最激氣係自己公司既公關為咗「飲茶」,成日搞大件事。明明個客只係呻兩句,其實都無乜嘢,佢地即係叫晒經理黎落簿、鬧你一場,出賣伙計、托大腳,只係為咗個客俾多啲貼士!

李先生 / 莊荷:你條數得唔得、牌例熟唔熟唔緊要,最緊要你笑容可嘉,兩年照樣可以升做主任,佢哋只係企後面,反正有我哋啲荷、有舊人做,但我哋人工比佢哋差一截。

陳小姐 / 監場主任:我地要一份糧打兩份工,「閂枱」、結數本身係區域經理做,依加要我地做埋,但係四、五年都無得升職坐正。

謝小姐 / 莊荷:賭場計數精過鬼!員工茶錢同底薪分開計,係外邊同人講年年加人工,其實百分比只係加落底薪度,個5、6%根本收唔足!公積金、補假全部都只係計底薪,好鬼崇!

蔡先生 / 莊荷:公司嘅評分制好唔公平,新人有無錯都唔可以俾太高分!你同上頭熟,攞十日病假都無問題;如果唔熟,就算一日假唔攞都無得升!

李先生 / 莊荷:而家賭場多競爭大,公司將啲客當神咁拜!明明規定每個鐘頭都會行鐘(休息),但個客賭開唔俾換人就無得走,有時人有三急都要死忍。個人無得休息梗係易出錯,到時做錯野又係鬧你!

周小姐 / 莊荷:話中場一半禁煙,根本係呃人!個客一喝就即刻攞個水樽過黎,禁煙區全部設係行人通道,搞到啲客食煙全部走晒黎賭檯邊,圍住我哋!好多同事有咽喉炎、鼻炎、心跳不穩,返工返到五癆七傷,賺幾多,睇醫生都要睇翻咁多!

何先生 / 次級監場主任:呢份辛苦工,做過就知痛。

博企連番出招後,「金銀行動」每場仍然有大約一千名員工參加

博企連番出招後,「金銀行動」每場仍然有大約一千名員工參加

博企連番出招後,「金銀行動」每場仍然有大約一千名員工參加

博企連番出招後,「金銀行動」每場仍然有大約一千名員工參加