即時報道
即時資訊、特別報道、即時評論。

【新聞解毒】︰選前變乜都得特首?  崔世安:唔敢當

即時報道

文:論盡編輯室

時間:2014年08月7日 19:19

今年選舉年,政府做嘢似乎突然爽手咗好多,「大禮」一籮籮。又向老人家派利是,敬老金加到七千蚊;年頭崔世安仲叫年輕人俾啲心機,「慢慢儲夠首期再講買樓」,「反離補」一役後,崔世安突然急市民所急,趕在參選前宣佈新城A區新規劃,開出十年後二萬八公屋的期票;《經屋法》新不如舊,越改越衰,經屋越起越細,俾市民鬧爆,政府一直話新法只行左兩年,又改唔合適,但係選舉在即,又可以即時開展經屋法檢討諮詢;就連就前一直無王管既「宰客的士」都有救,之前一直洗手既政府忽然硬起來,話會研究立法容許「放蛇」取證。養精蓄銳五年,崔政府終於回勇?

_DSC0445

崔世安今日出席公開活動時,被記者即場幽了一默,呢段時間好似變成「乜都得特首」?市民有求必應,如果每年都可以有一次特首選舉,或者民間怨氣就可即時化解。崔世安好謙咁話,自己唔係「乜都得特首」,亦唔敢接受這個稱呼,科學施政需要有依據同研究。但最近一些「政治決定」、特別是被指「長官意志」凌駕專業的A區規劃又有何科學依據同研究基礎?崔世安話自己樂意聽取意見,特別是有關未來五年的施政工作。

聽罷記者不禁嚇左一跳。咦!選舉都未開始,政綱都未講,咁快就跳到未來五年…….