新社區業主心聲

2013-10-11 打開門鎖以後 每週專題

文:什麼都不是(採訪)、未熄(採訪、整理)

時間:2013年10月11日 10:10

稍早時候,「論盡」和數位石排灣以及湖畔的業主進行了採訪,了解他們在住宅質量、社會設施等方面的問題。

其中住在居雅的、育有二子的黎先生表示,巴士班次不多之餘,等的人也多。基本上要等半個小時才有一班車返回澳門那邊。

訂閱每月紙本

「遲啲開學,如小朋友過來乘車去上學,班次又疏,會很困難。」

被問到假設石排灣規劃的學校開學了,會否讓小朋友返過來這邊居雅上學的時候,黎先生表示有機會考慮。

「我細嘅嗰個,才剛一歲。如果剛好入學階段它建好了,我會考慮。因為始終比較方便。」

自僱的Gilbert補充:

「依家輕軌2015都無期㗎啦,呢度應該都要好好徵詢民意,應該要幾多班次先至啱呢?即我哋好多時候,基本都有私家車或者電單車,咁其實社屋方面都開始越來越多人住架啦。呢方面都要將個配套做得好啲囉。」

對於網上傳出水有問題,剛開始裝修的陳小姐就表示還未測試。至於天然氣喉生鏽的問題,她就回應指爐具等打算全用採電力,所以也不知道情況,但也感到擔心。黎先生進一步說明:

「我洗咗2500元去割氣喉。一定要搵供應商上來鑿開牆,因為後面五至九座說有一個掣外露出來在上面,前一至四座有個掣是關着的。我把它改了在下面。但鑿開入面真係生鏽嘅。然後他們用那些黑色嘅唔知乜嘢油幫我漆了,再幫我駁回嗰條喉,再漆過一下,便走了。是生鏽的。裡面是生鏽的。」

黎先生更懷疑,居雅大廈有傾斜的問題:

「師傅做木工會用水平尺,證實了單位的天花是斜的。不過簽了約都沒得吵了,但想不到房屋局這樣都可以收貨。那很明顯:一做燈槽,會發現燈槽是斜的。用水平尺量不是斜的,但天花是。這不是我一個問題,我上Facebook見到有部分業主也有這個問題。」

問到居住環境不同了,會有甚麼擔心?陳小姐就擔心颱風來襲:「唔打風就冇事。一打風就水浸。出來了入唔返去,入咗去出唔返嚟。返工點算呢?博彩業朋友很多。」黎先生也想不到水浸問題在石排灣也會發生:他當時問看更,知道居雅停車場不厲害,業興那個是浸了,因為業興向下:那邊完全浸了。但釘了板沒人能進去,就不會有人知裡面的情況,除了看更以外。對於管理公司的服務,黎先生表示暫時覺得可以接受:「有見過(老鼠)但我沒影相,但插完(管理公司)唔會冇反應。插完識郁,識去做。好過插極都冇反應。」

湖畔大廈業主經常反映牆身穿孔,業主Jack表示並不清楚成因:「突然爆出來的。上好灰水,突然爆出來。」裝修師傅就解釋,是牆底做工不良。解決的方法也唯有見一個補一個。記者問Jack有沒有把灰水清理乾淨至見磚,他就說

「冇,因為好貴。但正常好地地一間新起的樓,不會差到咁啩!常說經屋經屋,我們低收入去買,然後間屋有一半政府補貼。證明呢間屋是以市價購買的。並不能夠因為我們用了百多萬元買,然後你就偷工減料,將貨就價。我們賣出去也是照市價,點解會咁呢?新樓喎!批牆批到見磚是幾十年十幾年樓才要咁做。」

他甚至聽聞過天花穿洞竟然見到樓上:「有冇咁過份呀?一層該有咁厚,但佢可以穿到見到樓上。點解會咁呢?」記者問看樓買樓跟住下來有感受不一樣嗎?他就說:「感受點解啲嘢咁爛!」

另一位居雅居民阿松就批評,大廈管理費昂貴:

「居雅收緊五毫九一呎,海擎天都係收緊七毫子一呎,豪庭都會都係收緊八毫子一呎,那麽……問題是別人的公共地方都計,例如大廈停車場,但人哋停車場只係對住客,或者租戶。咁你公用停車場無排他性嘛,任何人都可以泊車,咁面積計落,公共面積當中,所謂的建築面積當中,合不合理呢?而且,政府一直都很混淆,就是說實用面積是多少,現在實用面積,我們不是太大的質疑。咁你換算71.32%做建築面積,咁呢個係咪真係度到出嚟,定係純粹一個估算呢?咁如果係估算,其實對大家都不公平,因為你公共地方可能本身就無咁多,但你只不過去算式去計出嚟,大家又要交咁多既管理費,其實,真正有設施畀到住戶又有幾多呢?」

Gilbert補充:

「依家啲私樓,最低限度都1:1,甚至乎1:1.2,單位數目和車位的比例,咁問題係我地咁多人住先得個幾百個車位,重要係私家車加埋電單車先得咁少呢?同埋,重要係公共停車場嚟架喎。住得路環嘅,就係澳氹路三邊走㗎啦,無論是私家車還是電單車,尤其是私家車,你住得離島的話,很多人驚危險就一定開私家車㗎啦嘛,但係依家停車場車位先得咁少,OK!雖然我地不停咁投訴,很多住戶都可能以個人名義投訴嗰啲社會公共設施,遲啲會有多四百多個車位,但依然係唔夠㗎。」

「既然預咗係公共停車場啦,咁點解唔可以嗰個數量加多啲呢,兼且街位個到完全係零㗎呢?所以會形成非常之大問題。按官方講法,而個會係一個六萬人嘅社區,石排灣社區形成左之後,係咪要我地去路易十三、金豐南岸裡買車位呢?係咪要我地買一個二百幾萬嘅車位,去住一個五十幾萬既單位呢?呢個係車位嘅問題。」

他又指,社區很多中了標的租戶,其實都是沒有營業的,雖然「已經租緊,但可能住戶的數字仲唔係好多,驚做蝕本生意,咁變咗到依家都係死城一個。基本上很難解決生活需要,想落街買個掃把都唔得,要過氹仔抬過嚟,咁其實好唔方便。」

作為新一代的業主,會有甚麼樣的鄰里關係?Gilbert表示入伙前半年,已經約好網聚啊、遊車河、下午茶等,

「基本上係入住之前,已經發現居雅有問題,畀傳媒訪問之後又冇登啦,即交通問題喺六七個月前已經有傳媒問我哋㗎啦,我哋已經好詳盡講我哋嘅苦處,然之後係冇登嘅。到左真係,依家經過長年投訴之後呢?好多嘢都係未解決嘅!同埋依家經屋社屋,全部都係有身份證,好多都係土生土長嘅人,最快都係七年前就遞表申請啦,咁所以會有返澳門人那種鄰里關係,守望相助嘅感覺。呢個以前係冇嘅,可能因為……啊,樓市狂飆,狂炒,個個唔係南亞人,就大陸人,即鄰居車輪轉咁樣,唔會有個鄰里關係。但係依家同聲同氣,因為大家一齊面對好多嘅困難啦,我哋依班鄰居就更加團結啦,有返澳門以前睦鄰和諧的感覺,和諧廣場個名係無改錯嘅。」

阿松再解釋:

「因為真係好多問題大家鄰居都有體驗,一齊搵個解決方法囉。同埋我覺得新嘅社區都比較有朝氣,因為咁啱我地嗰代人都係出嚟做左冇耐嘢,又買唔起樓,咁啱先有咁嘅機會。真係好得意,就係當初大家知道有一件咁嘅事,就大家都去申請,之後好多年撞到個中學同學,依家都搬去同一個社區到住,即係左鄰右舍,大家更加Close咗,出嚟聚嘅機會更多。」

Gilbert舉了一個例子:

「之前我哋都有討論,搞唔搞買傢私團購咁?然後好快地我哋已經旋風式,全澳門嗰啲天然氣爐啊、電器啊,總之話自己係居雅嘅,就自動平10%,或者平兩百蚊,即係連團購都唔洗。嗰個凝聚力啊,影響會幾大啊咁樣囉。裝修師傅邊個好啊,究竟遇到啲問題會點啊,即大家會係網上分享,即刻就有千幾人。當然,年代不同,智能手機年代先至會有呢個未入伙都會識曬嘅情況,我諗呢個情況都幾特別,世間少有。」Jack就表示:「我哋(湖畔)呢邊啲人會散啲,即好難夾到啲人。佢地好快就有聚會,我地比較少,可能得幾個左右。但Facebook個到就有好多人囉。最好就有返啲社區活動囉,例如依家婦聯係到都有啲力嘅,都比較專注,可能澳門人一向都比較冷感啦。」

有問題時,會不會向相關部門投訴?Jack說︰

「事實已經擺在眼前,政府,官員都話無問題嘅。官話無問題就無問題架啦,但我聽說,政府做嘅,承建商做嘅,都係無問題,問題就出在班工人。工人,即係外勞黎㗎嘛,可能從中有什麼剝削,我們不知道。你都知曾經有人跳過樓啦,就話係嗰到搞我哋嘅。冇理由話,牆入面有鋁釘㗎嘛,如果係溝料,有報紙,紙巾碎都正常……」

Gilbert又舉了一個例子:

「嗰時水浸,新聞局出咗大大隻字話石排灣一帶冇水浸報告,公屋群裡面亦冇水浸既情況出現。然後我哋某啲鄰居就帶住幾份報紙嘅記者去影我地嗰個水浸嘅盛況。咁登完出嚟之後呢,房屋房亦都好協調地,好有效率地換了一間停車場嘅管理公司。我覺得有時候我哋作為住戶真係要做返啲嘢……」

Jack回應︰

「我自己住緊嗰邊啊,澳門嗰邊啊,就係有啲業主會嘅成員,但澳門人好少會咁……湖畔計,2000幾戶,我哋今日黎左三個人啫,澳門係咁樣嘅。你哋居雅已經比我哋好啦,所以如果要我哋小業主同房屋局咁大個門口傾,佢哋唔會理我哋㗎。好在我哋依家有Facebook,佢哋就插曬針喺到。即係依家我哋吵咗好耐,鋁釘啊、牆窿啊、停車場唔夠,湖畔未起好之前,我哋已經講緊架啦,仲寫曬請願信去交通局:無啦,加多兩個啦。但係依家我哋講完呢,澳日講完呢,即刻有人嚟睇啦,永遠都要係咁樣。即係話,依家我哋小業主上去係無用架,佢哋係唔會理你。所以,我哋依家習慣咗吵,就上Facebook吵,個度有政府官員睇住。組社團的話,我已經組過了,今年第三年,澳門搞個啲野,唔係你想像中咁簡單……」

最後,問到業主們有什麼滿意嘅地方?Gilbert說:「對於澳門法律加深咗了解,對於各部門之間嘅運作認識多咗。即係一般升斗市民唔會逐條法律去計,依家我哋個個都熟曬!」居雅業主Mandy表示認同:「你領完嘢之後,會上返房屋局嗰個細則、嗰個網嗰到,原來入邊啲細則,你真係領咗嘢,佢係有寫嘅,但係你一般睇都係睇房屋局個網嘅常用問題集嗰度之嘛,你用係用嗰啲,點知你領野唔係領嗰啲,而係領罕見問題集喎!」Gilbert補充︰「你冇理由要求每一個業主都係有法律專業嘅水平去同佢鬥㗎嘛。但係依家我哋經過長期訓練之後,我哋醒左好多啦!」

OLYMPUS DIGITAL CAMERA