永耀咖啡室屹立於風順堂街（聖老愣佐堂旁）二十多年。
「老闆！要杯熱啡吖唔該！」
「好！ 一杯熱啡！」
走進咖啡室，先向櫃台落Order，然後才拉開張圓凳仔悠然坐下。
不消幾秒鐘，一杯奶啡隨即放到我面前，拿起來低頭一呷，「對！就是這樣了！」瓦煲咖啡就是這樣滑溜溜，溫度又剛剛好，但我們都知道那罐奶不是重點。儘管我在外地品嚐過很多杯咖啡，就只有在澳門才找到這種會「天然」滑進你喉嚨的咖啡。我敢說，它的柔滑勝過咖啡的餘韻，令人難以意懷。究竟老闆你是怎樣做的？
老闆娓娓道來他與咖啡室的故事。
滑溜溜的秘密
「做咖啡就咁樣啫，冇乜其他。」老闆守在吧台前方，一臉從容地回答。
一定不是這樣的！！！
我膽粗粗走向老闆背後的爐頭，一賭那個「神聖的煲」，老闆再說：「就用煲藥嗰種瓦煲啫嘛，煮到咁上吓就加隻蛋落去個網到囉，嗱，蛋白喎。」接著他把放在瓦煲裡面的濾網拉起，我看到濾網染成咖啡色，想必它有過很多經歷。
「而且呢」，老闆隨我走出吧台，在外面的小圓椅坐下，接著說：「就唔好俾佢滾過籠喎，適當時候未有人嗌呢就要保暖，再冇人叫呢我就做凍啡，咁奉旨唔會舊吖嘛，呢啲就經驗積返嚟嘅技巧喇。」老闆說一個瓦煲最多只能煮四至六杯咖啡，每次需時約十五至三十分鐘不等，要根據「火候」來定。
「嘩，咁耐㗎？」
「係呀，我係慢慢㗎。提早十五分鐘去做囉，比如話我七點半開舖啦，我七點十五分就要煮㗎；如果下晝三點開舖呢，兩點四十五分就要煮囉。」
看來，這杯咖啡難得順柔，不止是那隻蛋白的功勞，更蘊含老闆的一份認真。雖然年時已高，病痛多了，但他還堅持喝自己煮的咖啡，以確保品質：「我飲少啲，一日都有一杯嘅，少少少少咁飲，咁唔係唔知道好唔好吖嘛。有時買番嚟嘅料呢，公司做得唔係咁好，咁我自己都知道吖嘛。」
千里馬也得要有伯樂，有技術也要有好材料，說到這裡，就不得不談及咖啡粉。「我地通常揀咖啡粉有三間，就捷成咖啡公司啦、捷安咖啡公司，同友誠咖啡公司，捷成、捷安呢，就集中啲，有規模啲。我地依家都係買特級或者頂級㗎喇，我唔愛曳嘢㗎，咁係吖，咁上吓價錢啫，唔需要買曳嘢
咖啡室仍然使用並式的瓷壺沖茶，瓦煲煮咖啡，極具風味。
「嚟嘆返杯咖啡」就是小城市民的日常生活
煮一世咖啡
我坐在永耀咖啡室，抬頭看那穩置在天花的吊扇，陣陣涼風抽送到地面，不知道它轉呀轉﹑轉呀轉，轉了多少個歲月。櫃台裡的西式鐵皮盒﹑店內的小方塊地磚﹑老闆娘拿著的白瓷水壺，上居下舖的建築設計，每樣都在呈現歷史。
「廿幾年啦，我1988年開嘅，我嚮河邊新街走返番嚟嘅，嗰度要拆啦嘛。」
「我地一開始係擺街邊嘅。」老闆娘和應道。
「我十七歲就入行㗎喇，最初呢，就跟住我爸爸﹑同埋我啲老表學嘅。你梗有個識嘅教你至做得好㗎，白茫茫做係唔好㗎。我好細個啫嘛，十七歲，我老表二十歲度啦，佢主要幫我爸爸手。咁你得就幫我手做啦，唔得就去打工，人望高處吖係咪？佢就幫我爸爸開荒，教識我爸爸﹑教識我啦，我爸爸後就老啦，我就去幫爸爸手，舊時辛苦生意㗎，一毫子一個麵包，兩毫子一杯咖啡，後尾生意都仍然淡，收尾就出去打工，後來去河邊新街頂咗一個世伯母嘅檔口做，做咗十八年，就搬嚟呢度喇。」
老闆娓娓道來入行經過，原來起初是家族的小生意，但為見識必須出外闖一闖。「嗱，我出去打過工嘅，就跟一個叫凌旭先生，就嚮香港過嚟嘅，就學佢啲嘢。你聽佢講喎，就要做㗎喎，因為佢會吩咐你㗎嘛。通常呢十二點落場，兩三點就要返喇，夜晚就六點落，九點就要返喇，好辛苦㗎。我當時一九六幾年，三十幾歲去做，但係咁就學到嘢，淨係自己呢，就坐井觀天，睇唔到幾多嘢，你出去浸過呢，就學到人地啲嘢，見過多啲場面，呢個事實嚟嘅。」
「我就嚮南灣戲院對面個常坤冰室度做過㗎。嗰陣時呢度冇咩生意吖嘛，咁我就唔做啦，就俾我媽媽同細佬做啦，我自己出去做啦。最初呢就六蚊一日，收尾嗰老闆睇我嗰樣，嘩都得喎，八蚊啦。我臨走嗰時，一個月三百二蚊人工，即係十一蚊一日㗎啦，因為師傅落場﹑行開咗，佢知我做得到吖嘛。我嚮屋企已經做開㗎啦嘛，基礎嘅嘢我都識㗎啦，我去學佢嘅技巧吖嘛。」我試著從老闆口中拼湊小城歷史，今天每年垂手可得的九千元，在當時社會絕對匪夷所思。
「我爸爸媽媽就嚮呢度住開嘅，我爸爸過咗身，我媽媽就話：『你俾心機供咗佢啦。』當時啲樓唔係好貴，幾十萬啫，依家值錢喇，我都好多謝我媽媽勸我。當時呢，俾幾萬數首期就可以慢慢供㗎喇，嗰陣時啲錢好難搵㗎，你估好似依家咁有九千蚊分咩？派錢呢！對我嚟講，係止痛餅嚟㗎，我覺得唔係好，應該起多啲醫院做多啲福利就啱。」老闆見證整個小城發展，說故事也不忘評價，盡顯老澳門人的一貫氣派。
走過中葡時代，老闆對葡人﹑中國人的口味甚為掌握，「鬼佬嗰啲濃啲，嗱你香港就英式吖，但係我地都係參考嚟做，因為要迎合地區嗰啲人吖嘛。洋人咖啡呢就鐘意落少少白蘭地落去㗎，啲中國人呢就唔係咁鐘意喇。」那麼，有葡人喜歡我們傳統的瓦煲咖啡嗎？老闆回說：「舊時有㗎」，並表示以前「咖啡就講濃香，茶就講清香，我兩樣都研究㗎。」
從十七歲到現在七十七歲，老闆你不就煮很久咖啡了？
「一世㗎喇！」
老闆說每次只能煮四到五杯咖啡，而且保溫很重要。
昔日的炭爐已改成電爐，但老闆鑽研後，煮出來的咖啡味道差異不大。
告別炭燒的日子
煮了六十年咖啡，原來從上個月開始，老闆也應政府部門指示，避免產生一氧化碳的問題而作更換爐頭。老闆說要誠實對待消費者，所以牆上掛著的舊報導標題中，炭燒瓦煲咖啡的「炭」字，改用一個「電」字覆蓋。
「佢話有一氧化碳喎，佢話燒炭呢，唔係唔好，但係對我健康會影響。幾十年我都係咁燒咯，我冇嘜問題喎？但係呢我唔反駁，佢話衛生局俾張紙你呢就可以，我費事啦。九月七日開始啫嘛，我申請咗個大電錶，就改用電爐囉。改都要成萬蚊㗎，啱啱好有九千蚊津貼咯，咪將嗰九千蚊『銀』落去囉！」
你不得不說老闆的敬業樂業，如今距離他說的「八十歲退休界線」只剩三年，但為求火候夠﹑煮好啡，便花錢改爐頭繼續服務大眾。「我頭頭用一個細電爐唔夠呀，所以申請個大電錶，整三個電爐。」但換了用電，味道會變嗎？
「差唔多！差唔多㗎啫！但係你煮嗰陣呢，唔好猛火喎，有時要較返慢火，我自己有研究，我細佬同我一齊研究。」老闆自信地說，再次重申煮咖啡只在於慢慢的心思，掌握火候，便是成功關鍵：「好簡單，只要有心思，即係肯鑽研。即係煎魚一樣啫嘛，唔好過火，啱啱適中。第一次煎「濃」嘢，就自己食啦，唔好賣俾人地啦，但係第二次唔好煎「濃」，點樣避免？較慢啲火，耐啲時間。」老闆一字一語地描述：「即係想快，但係唔可以㗎！係物理上唔可以太快！你慢慢先靚，你快呢？有啲野就唔得靚。」
戀戀咖啡店
永耀咖啡室就這樣陪我們慢慢走過一年又一年，時代換了，周邊的風景也變了不少。老闆即將步入八十歲，咖啡室未來的經營就看看兒女的個人意願，直率的他毫不顧忌地交代自己的身體狀況：「好辛苦㗎！八十歲你點做呀？我辛苦我唔話你知啫，你見我依家咁精神咋，落咗場我就『謝』晒喇。」
將來咖啡室會怎樣？我們都不知道，或許就像老闆所言：「做得一日得一日」，我們「飲得一杯得一杯」。
（鳴謝：永耀咖啡室老闆及老闆娘）
