#029 新土地鍊金術論盡紙本
▧ 封面專題:今期CD區背後的土地戲法將大解密。 ▧ 藝文爛鬼樓:公共空間爭奪戰──愛都,別無他選? ▧ 綠色生活:在自然保護區里度過清新有趣的一段時光 ▧ 城牆之下:「天主聖名之城」的燦爛故事。 ▧ 遛躂澳門街:但見蓮溪廟的地界石已半埋地中。   ◈ 每月一號出版 定價:MOP$5 / NT$ 45 售賣地點:http://aamacau.com/?p=7737 訂購表格:http://aamacau.com/?p=3847 廣告聯絡:[email protected]

烏雲蓋頂,澳門可否走出歐案後遺?

#029 新土地鍊金術論盡紙本

文:張良

時間:2015年09月15日 10:10

特首崔世安去年高票連任後,的確為政府帶來一番新氣象,令人刮目相看。先是大膽起用在歐案作供時「扮失憶」的前工務局副局長李燦烽班師回朝,重掌帥印,開公職人員錄用風氣之先,品德操守都可以掉埋一邊。

新班底果然無令市民失望,換屆短短八個月,高潮浪接浪。放高「漁頭」賣大包,仲要送埋容積率和地積比,真係識為發展商著想;放生16幅閒置地,承批公司長年囤積土地唔發展,多次轉手無本生利賺幾億,回歸15年特區政府首次第一時間跪低話自己錯,孺子可教!人貴坦誠,官員早預言「放生」陸續有黎,乃真陽光政府典範。

城規會審議漁人碼頭新規劃草案當日,有民到工務局抗議。

城規會審議漁人碼頭新規劃草案當日,有民到工務局抗議。

新城諮詢藏頭露尾搞到一鑊粥,旅遊文化設施偷換豪宅,為南灣湖CD區放高暗暗開路,焚化爐係社區隔離有咩問題?交通系統未規劃好有咩問題?望唔到主教山有咩問題?擺明假諮詢有咩問題?硬銷方案的代副局張潤民兩脥插刀、赤膊上陣,在公聽會上臉不改容,越戰越勇,即刻升職坐正,咁咪叫賞罰分明!

另一邊廂,新《土地法》(第44條) 藥力生效,凡到期未起好、未發入伙紙,未在25年期限內轉為確定性批給的批租地都要收返。4月新運輸工務司果真依法辦事,收回青洲一塊未開發的工業用地 (當然只係地碎) ,仲趕緊尾班車嘅發展商大驚!官委議員、御用護法率先跳出來在立法會上喊話:好大一個法律漏洞,要修法!

地產業界場外齊聲和應,為將在年底到期的5千樓花單位呼冤,為唔知係邊嘅小業主哀鳴。直選議員麥瑞權義憤填膺:政府收番變爛尾樓,迫建商破產,工人有汗出無糧出,隨時要上街!影響社會和諧繁榮穩定,政府放生發展商等於放過自己!

神機妙算要數漁人碼頭和信德,一個未卜先知工務局實會放水,批准酒店放高到90米,早早在上市公司年報向股民報喜;一個係政府大債主,未批地幾年前已經賣定巨型樓盤廣告。有投資眼光自然贏在起跑線,當年用5億向蕭德雄買入益隆爆竹廠地債,換走美高梅、壹號湖畔地皇已經贏番利息,剩番大拿拿八萬幾平方米,慢慢同政府計。按番當年樓地板(建築面積) 一呎換一呎,可能俾埋成個新城B區都唔夠。欠債還錢天經定義!就算政府第二時諗住擺平班阻住發展又嗌無樓住嘅丟民,唔搞主教山,將政法區同豪宅「東西互換」都唔使憂,遮左美高梅唔緊要,反正無敵大海景都係自己賺番。

從官網圖片可見「南灣海岸」一直從南灣湖D2延伸至D5地段,但該區2幅公家批並未批出,信德預計該住宅項目建築面積超過400萬平方呎。

從官網圖片可見「南灣海岸」一直從南灣湖D2延伸至D5地段,但該區2幅公家批並未批出,信德預計該住宅項目建築面積超過400萬平方呎。

不過講到「三放」,當年建築界翻雲覆雨點石成金嘅林偉真係無得輸,足足贏漁頭成條街。林偉用兩個複式單位加個車位已經氹到歐文龍連續三次破例,將南灣湖C7地段個盤加高成百米,以而家樓價至少賺多百幾億,連當年主控官係庭上都話呢個係「回歸後破天荒的首例」。歐文龍係咪真係讀理科出身?人地以小搏大,佢就以大搏小,數真係唔係咁計。

隨著無形之手操控起舞,歐文龍真係一個絕世「超高魔術師」,一對魔術手街影話廢就廢,超高樓要幾高有幾高,明明得2、30都可以加到百四。合併地皮先至最神,人地割街開路,佢割埋條馬路送俾人,南灣湖C區發水奇蹟有版你睇。

歐文龍時代留下既「土地乾坤大挪移」大法至今依然廣傳,按「需求」重新組合,符合「發展(商)最大效益」。06年那些濕了水、樓地板發脹好幾倍的街線圖已經失效,但那些多年來原封不動的圍板,連未批出的公地也可以堂而皇之的圍封起來,無人過問,便是南灣湖超高樓、發水樓可能再現的最佳佐證。