【第一現場】新任「土地公」羅立文還未來得及處理坊間盛傳的「四大死任務」，轄下部門已經連環爆，多個局級官員先後跳船，淨低一個爛攤子，已經夠頭痕！琴日更爆出海事及水務局1名領導和1名主管涉嫌受賄，被司法機關勒令停職。羅司今日被記者追訪時都幾無奈咁笑笑口話︰「或者風水唔好啦！」唔好睇羅司係土生，但國語講得好過「笨忍」不知幾多，吸收唔少中華文化精粹，難怪早前一上任就話司長辦要搞下裝修，唔通真係有先見之明？！
羅立文證實，海事局涉貪案涉及副局長及1名廳長，至於其他野，例牌都係舉手投降話唔清楚，「金額、發生緊咩事，我自己都唔知。」他只稱短時間內填補人員空缺，將工作影響減至最低。
澳門街，有官都無人做！咁點收科？羅立文就話，咁多局長吉左對工作不是一件好事，但會盡量做好。又著記者「逐步黎，唔好咁心急啦！」
